Ka nemu menua Entanggor?

SELAMAT DATAI KA RUAI KITAI

Menua Entanggor tu siti menua di Sarawak, Malaysia, kena pegai sitak Semarahan ba ulu sungai Sebangan, Simunjan.

Bisi sebuah rumah panjai enggau 49 buah rumah nyembuah kediri,rumah panjai nya bisi 16 pintu bilik. Pemayuh tubuh ti nguwan menua kitai tu di angar ka 200 iku, ia kediau mendam di menua kitai tu lalu di pegai siku tuai rumah ia nya tuai rumah Gem anak Jenta.

Menua kitai tu ngembuan rempa menua ti manah, ai sungai ti chiru serta agi mayuh macham bansa ikan.Agi bisi ngembuan kampong galau ti besai, kitai ulih meda pun kayu ti besai-besai sampai mangai ngagai 5 sakap pun kayu.Kitai bernasib agi ulih ngetan utai tu ari kena kachau tukey-tukey balak, ti baka kalat ti deka nerunpak asil menua kitai.Sida ia ukai semina ngambi asil ari menua kitai tang, lalu ngamah menua , ngeruh sungai, munuh ikan, utai tu mesti dijaga kitai semua. Nyadi utai patut di kerandau, di pejurai ka kitai sama empu menua, ngiga jalai bekani chara kitai ulih ngetan utai pulai asil kitai empu menua.

Pulai ngagai charita menua Entanggor tu tadi, baka ni kitai ulih nemuai ka menua Entanggor?

Keterubah, kita nganatai kediri di pasar Sebangan dulu, ari pasar Sebangan kitai mudik ngulu sungai Sebangan, ngena prau injin pam tauka injin laju, kitai mansa menua Tungkah Iban, Tungkah Melayu, menua Sekitong. menua Lubuk Meranti, menua Engsika sungai Setika enggau Sungai Ijok nya baru kitai datai di nanga Entanggor. Pengalama kitai mudik ari pasar Sebangan ngagai nanga Entanggor kurang lebih 3 ngagai 4 jam, tu bepangai ba pengelaju prau enggau pasang surut ai. Enti maya pengujan tauka ai besai, kitai lalu ulih mudik ngulu sungai Entanggor lalu nyankai di pekalan, tang maya kemarau, bebatak meh kitai nengah pasir ngulu sungai Entanggor, dalam pengalama sejam setengah, kitai ulih besagam ka ikan sambil mandi.
Chara ti ka kedua, kitai ulih nemuai ka menua Entanggor tu ianya bejalai kaki( bedarat), kitai bejalai kaki berenkah ari menua Lunying. Menua Lunying tu sepiak menua Entanggor berantara ka bukit siti jelan ia peninggi, menua Lunying tu udah datai jalai alun, ti besambung ngagai pasar Sebuyau, Sebangan, pengkalan fery Sungai Bulu/Seruyuk enggau Simunjan. Pejalai ari Lunying ngagai Entanggor tu kurang lebih 3 jam niteh ka penegar kitai bejalai. Lebuh kitai bejalai tu, kitai nerasa kebun getah, nengah temuda lalu mega nengah kampong, dia kitai bisi bepeda ka jelu baka Tupai, Engkarabak, Melibui( sebansa enggau tupai tang besai) lalu mayuh bansa burung ia ka besai enggau ka mit. Menua tu mega agi mayuh jelu babas, baka Babi kampong, Tengiling, Kijang, Pelanduk, Landak, Angkih lalu mayuh ia ka bukai. Jalai darat tu meh jalai ti dikena bala enembiak sekula menengah Sebuyau, pulai tauka mansang ka sekula lebuh maya cuti.

Uji peda gambar sepiak tu, tu meh sungai Sebangan, jalai prau kami keluar masuk ka pasar Sebangan. Sungai alit laban rebak, anjut ari ulu lebuh ai besai. Uji perati nanah-manah nama ti ngasuh rebak nya nyankut?

Tu meh jalai rill kompeni balak meraka sungai, jematan rill tu kulu kampung Sungai Ijok.Sida ia bulih pengaya, bulih pengeraja kami tang kami bulih penusah, bulih pemedih. Kami bebatak nengah tu, datai ka sejam pengalama.

Sungai Sebangan tu meh jalai besai kitai menua tu laban ti bedau bisi jalai alun tau ka jalai raya,enti nitih ka menua kitai Entanggor tu enda bangat jauh ari jalai induk(jalai Sebangan Sebuyau) tang kitai enda nemu nama kebuah perintah menua kitai Sarawak tu bedau ulih besanbung ka jalai ngagai menua kitai tu. Enti nitih ka budget 2008(jalan kait entanggor phasa 2) tu tadi, kitai udah bisi peruntukan kena bersambung ka jalai tu tang nama kebuah umkup belanja tu enda di kena?

Bala YB kitai semina datai lebuh maya bekimpen aja bisi datai, lebuh maya tu lah sida madah ka ngaga jalai tang nama kebuah peruntukan tu enda dikena? YB enda ingat ka semaya sida kah?

Sungai alit laban rebak rumput anjut ari ulu lebuh ai besai tu tadi.

Chukup merinsa undur kili, bendar babtak.

Bala kami ka berenkah ngalasi sungai ti alit, bekatu tu pengawa di menua, compeni ti ngaga hal tu nadai temu tunga.